Hjartans Sigrún Hulda Garðarsdóttir móðursystir mín er fallin frá, bjarti hjúkrunarfræðingurinn góði, með fallega brosið og minningarnar streyma fram í hugann.
Ég á eingöngu góðar minningar um þessa yndislegu konu, alveg síðan ég var barn og það er mjög dýrmætt að hafa fengið að vera hluti af fjölskyldu sem að lætur sig varða um fólkið sitt. Sigrún elskaði fólkið sitt skilyrðislaust og endalaust. Ófá eru kortin og bréfin og hamingjuóskirnar sem hún sendi, alltaf að samgleðjast eða senda góðar óskir. Hún fylgdist með öllu og knúsin voru innileg og góð.
Sigrún var með einstaklega góða og ljúfa nærveru, og umvafði okkur öll með ást og væntumþykju. Það breyttist ekki eftir að hún flutist til Kanada og það var alltaf tilhlökkunarefni þegar maður frétti að von væri á henni í Íslandsheimsókn. Hún var dugleg að heimsækja Ísland og sem dæmi um ástúð hennar gerði hún sér sérstaka ferð þegar móðir mín greindist mjög veik af sjúkdómi sem síðar lagði hana að velli, og hún ásamt systrunum Önnu Siggu og Silvíu, ásamt bróður þeirra Garðari Þórahalli, stóðu öll þétt saman sem einn maður utan um það verkefni og verður það seint fullþakkað. Ástúðin, elskulegheitin og samkenndin í þeim lífsins ólgusjó voru okkur sannkallaður bjargvættur.
Sigrún var hláturmild og þekkt fyrir frábæran húmor, eins og reyndar þau öll systkinin sem eru fimm talsins, og það er einmitt það sem að mér finnst best við þau. Þannig verða til góðar minningar. Þannig verður léttbærara að kveðja þegar kallið kemur. Hún var stolt af sínu fólki, elskaði syni sína, Magna og Garðar, mjög mikið sem og Björn Alden sonarson sinn, son Magna, afar heitt. Ykkar missir er mikill elsku frændur mínir og sendi ég ykkur mínar einlægustu samúðarkveðjur. Einnig sendi ég samúðarkveðjur til Kimberly, Guðmundar, dætra Loyds og systkina Sigrúnar.
Minnig Sigrúnar lifir í hjörtum okkar. Hvil í friði elsku frænka mín og ég vona að þú og Erla systir þín, og móðir mín séuð núna saman að syngja „Amarula sönginn“ góða, eða „Rúllandi ömmur“ eins og hann heitir á Karfavogsnesku. Við birtum þann texta samt ekki hér.
Litfríð og ljóshærð
og létt undir brún,
handsmá og hýreyg
og heitir Sigrún.
Sofðu mín Sigrún
og sofðu nú rótt,
Guð faðir gefi
góða þér nótt.
(Jón Thoroddsen)
Kveðja frá systurdóttur þinni Erlu Kristbjörgu og frá Heklu Karen og fjölskyldu.
Ásta Karen Ágústsdóttir
